Lo trin de la dança

MENESTRÈRS GASCONS

Objecte sociau : Pratica e promocion de la cultura gascona en totas las soas fòrmas e tanben l’organizacion e la venta d’espèctacles.

Intitulat deu projècte: Libe-CD taus mainats « Lo trin de la dança ».

Presentacion: Creacion d’un libe-CD de danças taus mainats de dus ans enlà, suu tèma deu trin e deu viatge de manèra mei larga. Aqueste utís, qui n’existeish pas actuaument, que respón aus navèths besonhs pedagogics de las familhas e de las ninoèras, escòlas, centres de lésers. Que permeterà de’s familiarisar e de desvolopar l’improvisacion, la saunejada, l’imaginacion, l’aprentissatge de l’escota, deus ritmes complèxes, deus ambients, shens desbrombar la dança com vector de ligam sociau. Lo CD qui acompanha lo libe en occitan qu’serà provedit de comptinas e cantas particularament adaptadas aus mainats: cantas enumerativas, colors, onomatopèas, partidas deu còs uman, etc. Peu son tratament grafic, lo libe que serà un utís mei tà caminar en aqueth univèrs imaginari e oniric. Lo repertòri (interpretat dab flabutas, tamborins, tuba, mandòlina, acordeon, etc.) qu’ei compausat tà la magèr part de creacions (rondèus, pòlcas, saut biarnés,…) e de danças tradicionaus arrevisitadas (Jan Petit, Peiroton, Dança de l’escoba, Pedro Gil aragones,…).

Soma balhada per Ligams: 2 500 €.