Remesa deus chècs de La Passem 2018

Diluns passat, 11 de març de 2019, l’associacion Ligams que convidè a la premsa entà assistir a la remesa deus chècs a las associacions dont los projèctes estón arretienuts arron La Passem 2018 qui permetó de crubar 48 000 €.

Qu’estó a l’InÒc Aquitània, au castèth d’Este de Vilhèra, que’s tienó aquera ceremonia.

7 projèctes qu’estón lavetz arretienuts peu comitat de seleccion suu vintenat de recebuts, aquiu que n’avetz ua presentacion :

  • 2000 € entà la creacion peus Chancaires de Sent Pè de Lèren de panèus ludics e educatius a l’entorn deu parc d’aprentissatge de las chancas.
  • 2500 € entau libe-CD taus mainats « Lo trin de la dança » de la Companhia Crestian Josuèr, portat peus Menestrèrs Gascons.
  • 3000 € entà l’edicion d’un recuelh « Contes Charnègues – Au fil de la Bidouze » per Bidache Culture.
  • 4000 € entà la mesa en plaça peu CFPÒC Novèla Aquitània de jornadas d’iniciacion a la lenga « Familhas en Lenga » entaus pairs d’escolans qui an un contacte (sia a Calandreta, en site bilingüe, en ahortit, en opcion…) dab la lenga.
  • 5000 € entà la seria audiovisuau en occitan a l’entorn de « Pelòt » per l’associacion Art’Òc.
  • 2500 € entà la reedicion deu « Diccionari deu Biarnés e Gascon modèrnes » de Simin Palay per las Edicions Reclams.
  • 24 000 € entaus dus projèctes de la Federacion Departamentau Calandreta: la creacion deu Pòle Educatiu de Pau (qui agroparà la Calandreta de Pau, la de Masèras e lo Collègi de Gasconha en un sol endret) e l’obertura d’ua Calandreta a Vilhèra en seteme de 2019.

Aquesta serada qu’estó tanben lo parat peu Daniel Barneix, president de l’associacion Ligams, de har un bilanç deus positius de La Passem 2018 e de’ns desvelar en abans-purmèra quauquas informacions sus La Passem 2020.

En efèit, aquesta que’s veirà alargada tant peus quilomètres com per la durada. 600 kms que seràn corruts en 2020 en 72h, sian 4 dias e 3 nueits shens cès ni repaus, qui ns’amiaràn dinc a Bigòrra e las Lanas.